Horcopowětrowa friteza

Čas grilowanja je nimo a tuž sydaja zaso husćišo chłóšćenki, kotrež so nutřka přihotuja. Wosebje pola swójbow je woblubowany wosebity aparat, w kotrymž so wšelake zežiwidła fritěrować hodźa. Hišće před někotrymi lětami bě samozrozumliwe, zo so na přikład neple w horcym woliju fritěruja, wšak su nastate fritki rjenje chrymstate. Komuž je to přetučne, tón móže sej fritki tež w pjecy napjec, ale tajke fritki su bóle mjechke. Tohodla je so drje mjeztym wosebity aparaćik rozšěrił, kotryž móže z mjenje tukom abo scyła bjez njeho zežiwidła fritěrować. Němsce rěka tajki aparat „Heißluftfritteuse“. Mjeno hižo přeradźi, zo so tule z pomocu horceho powětra neple a druhe zežiwidła fritěruja. Serbsce móhli tajki aparat mjenować horcopowětrowa friteza, a to po mustrje wuraza horcopowětrowy balon, kotryž hižo w serbskej rěči znajemy. Tajka z horcym powětrom dźěłaca friteza móže zwjetša tež grilować a pjec. Wězo maja tež klasiske pjecy tajke funkcije, ale friteza přetrjeba wo wjele mjenje energije, štož je runje při stupacych płaćiznach miliny dobry plus. Tuž přeju Wam z Wašej horcopowětrowej fritezu dale wjele wjesela a tež wuspěcha při wuprobowanju nowych receptow.

A. Pohončowa

Themen: Sorbische Entsprechungen für deutsche Wörter

Schlüsselwörter: komplexe Benennung

Wörter: horcopowětrowa friteza, Heißluftfriteuse