Wotwobaranski spray

Mnozy z Was jón zawěsće znaja, snano sami wobsedźa abo dyrbjachu jón samo hižo nałožować. Měnju tak mjenowany „Pfefferspray“. Pomjenowanje „Pfefferspray“ zwisuje z jeho wobstatkom, kotryž so dobywa z chilijowych tručkow. Popjer to wšak njeje, ale podobnje kaž popjer wuskutkuje nałožowanje tajkeho sprayja ćělnu reakciju, zo bychmy so před strašnymi nadběhami škitali. Serbsce móžemy tajki spray mjenować popjerjowy spray. Tež w někotrych druhich rěčach namakamy wotpowědniki ze słowom popjer, na přikład jendźelsce pepper spray abo pólsce gaz pieprzowy. Móhli jón pak tohorunja mjenować zakitowanski abo wotwobaranski spray, wšak je nałožowanje myslene za zakitowanje resp. za wotwobaranje strašnych situacijow, na přikład pola dźiwich zwěrjatow. Ale kedźbujće, nałožowanje popjerjoweho sprayja přećiwo čłowjekam je w Němskej jenož w nuznych padach jako wotwobaranski srědk dowoleny, wšak móže spray strowotniske ćeže zawinować. – Lubi připosłucharjo, přeju Wam, zo njebyšće ženje popjerjowy spray wužiwać dyrbjeli.

A. Pohončowa

temy: serbske wotpowědniki za němske słowa

klučowe słowa: substantiw

hesła: Pfefferspray, wotwobaranski spray, Abwehrspray, zakitowanski spray, popjerowy spray